• Rajaa Aquil

لا يوجد طفل لا يفهم، بل يوجد معلم لا يعرف التواصل معه



ما فيش طفل ما بيفهمش، فيه معلم مش عارف يوصل المعلومة للطفل!

إنهاردة قابلت بنت مصرية من أجمل واذكي البنات. مِنة، بنت عندها 12 سنة، سريعة البديهة، حاضرة، وشها باشوش مبتسمة طول الوقت. قليّلة في الحجم لكنها حاضرة وفرضة وجودها، بتساعد والدتها في كسب قوتها. بنت مصرية جدعة صحيح، ده هو مستقبل وشباب مصر واللي لازم نهتم بي. سألتها:

أنا: عاملة ايه في الإنجليزي يامنة؟

منة: ما بحبوش ومش فاهمة حاجة فيه خالص.

أنا: ليه يا منة؟ ده الإنجليزي لغة حلوة وكل حاجة دلوقت بالإنجليزي، هاتي كتابك نشوف أيه هي المشكلة؟

منة غابت دقائق وجابت الكتاب. كتاب سنة سادسة ابتدائي. بصيت وتصفحت الكتاب، لكن أول حاجة خضتني هو حجم الكتاب، وانه كتاب الترم الأول. يعني الكتاب ده المفروض ان الطلبة يكونوا عرفوه ودرسوا المعلومات اللي فيها كلها وفي 3 شهور بس، لانهم امتحنوا في الإنجليزي من يومين. شكل الكتاب يخض الصراحة. وعرفت انه فيه كتاب الترم الثاني واكيد هيكون بنفس الحجم!!!!!

في أول صفحتين في الكتاب فيه كود يقدر الواحد يصوره عشان يوصل لموقع الكتاب على النت. وفيه كمان عنوان موقع الكتاب. في الموقع ملفات سمعية (listening files) بناء على محتويات الكتاب. وطبعا سألت منة لو دخلت الموقع عشان تسمع الملفات. اجابتها كانت بالنفي وهي أصلا ما تعرفش يعني ايه "انترنت".

منة: ايه الانترنت ده؟ انا بسمع عنه كتير ومش عارفة هو أيه؟

أنا: الانترنت ده هو مكتبة الكرة الأرضية. منة انت بتاخدي جغرافيا وعارفة يعني ايه الكرة الأرضية صح؟

منة: أيوة عارفة واعرف عن القارات.

أنا: برافو عليك. زي المكتبة اللي في المدرسة اللي حكيتي عنها من شوية، الانترنت ده مكتبة وقاعدة معلومات فيها حاجات كتيره تقدري تتعلمي منها. مكتبة المدرسة مكان محدد بجدار وحيطة وكتب على قد الارفف والمكان المخصص لهم. اما الانترنت ما فيش تحديد ولا مكان ولا ارفف. المعلومات على مواقع الكترونية.

منة : آه فهمت. عندنا في المدرسة الولاد الشاطرين دايما يتكلموا عنه ويجيبوا نمر كويسة.

أنا: طبعا الانترنت ممكن يكون بدل المدرس الخصوصي بس لازم تعرفي ازاي تستخدميه أحسن استخدام. هو انتم ما عندكمش حصة كومبيوتر في المدرسة؟

منة: لا عندنا بس الكومبيوتر اللي بقعد علية دايما بيبقى بايظ، ولو مش بايظ ما فيش حد بيعلمنا.

(تنهيدة مني بس طبعا جوايا متحسرة على اللي بسمعة)

ورجعنا لأساس مقابلتي مع منة، هو إني اساعدها في الإنجليزي.

أنا: طيب نرجع للإنجليزي، قول لي بقى أيه المشكلة؟

منة: مش عارفة اقراه.

خليتها تقرأ، لاقيتها حافظة اسامي الحروف ولكن مش عارف تنطق. عرفت طبعا سبب المشكلة وبدأت معاها اشرح لها يعني ايه مقاطع ويعني ايه حروف متحركة، حروف ساكنة والمقطع يتنطق ازاي. يعني بدأنا بال Phonics (فونيكس) اللي هي أساس قراءة في أي لغة

تأثرت جداً وزعلت لحال التدريس في المدارس الحكومية هنا. عرفت منها ان دوام التدريس 3 ساعات ونص. الفصل فيه 60 طالب وطالبة. المدرس لا يسمح للتلميذ انه يسأل أي سؤال. المدرس ممكن يخش الدرس يقعد يتكلم طول الساعة، التلميذ فهم وما فهمش مش مهم. لا في أنشطة تعليم من خلالها المادة أو نقطة التعليم التلميذ يقدر يتدرب ويتعلم فيها.

أنا على فكرة متابعة المجهود اللي بيعمله دكتور طارق شوقي. وشفت كتاب الإنجليزي والعربي سنة أولى. بس يا ترى فيه اهتمام بتدريب المعلمين وتأهيلهم؟ ها يعملوا ايه في عدد الطلاب ده؟

صحيح زي ما قرأت على بعض البوستات على فيس بوك انه زيادة عدد الفصول والمدارس مهم. المهم وصلت لبعض العناصر اللي اظنها مهمه جدا لتطوير التعليم الابتدائي وأحب اشاركم فيها وهي:

1- قيادة المدرسة، لازم يكون فيه قيادة والكل مشترك فيها من اداريين ومعلمين.

2- المكان: المكان لازم يكون صالح ومحفز للتعليم، وبالتالي تدرج تحت النقطة دي عدد الفصول وعدد الطلاب.

3- التدعيم المادي: مين اللي بيصرف على المدارس دي؟ الحكومة لوحدها ما تقدرش. لازم يكون في دعم مادي من الأهالي. هل هناك جمعيات أهلية تدعم المدارس مادياً؟

4- خبرة وتأهيل المعلمين؟ هل بيتم دوريات وورشات عمل لتحديث وسائل التعليم وهل كل المدرسين مؤهلين بالتعليم عن طريق الكومبيوتر.

5- رفع سقف التوقعات وتكون عالية. مثلاً الطفل مجهز من الله سبحانه وتعالى لتعلم أي شيء، بس نعرضه للمعلومات (input) المناسبة وبالطريقة المناسبة. ورفع التوقعات لا يكون بالنسبة للتلميذ ولكن يكون بالنسبة للمدرسة والمعلمين، وبالتالي الكل يعمل ويجاهد على الارتفاع بالمستوى.

0 views

Center for Acquisition of Language, Literacy And Culture- CALLAC

©2018 by CALLAC.